Pasi braktisi seancën e jashtëzakonshme plenare, ku u miratuan dekretet për shkarkimin dhe emërimin e ministrave të rinj, kryetari i PD-së Lulzim Basha ka mbledhur aleatët.
Mësohet se takimi po mbahet në selinë e Partisë Demokratike.
Burime nga selia blu, bëjnë me dije se në takim po diskutohen marrëdhëniet me parlamentin.
Po ashtu, bëhet e ditur në orën 19:30 se opozita e bashkuar do të mbajë një deklaratë në selinë blu.
Ditën e sotme kryetarët e grupeve parlamentare të PD dhe LSI kërkuan që të merrnin fjalën për debat, kërkesë që u hodh poshtë nga kryetari i Kuvendit.
Më pas, kreu i Partisë Demokratike, Lulzim Basha, tha nga oborri i ndërtesës së Parlamentit, se me këtë vendim, mori fund edhe Parlamenti, duke u vendosur nën kontrollin e Edi Ramës.
Ka qenë kryetarja e LSI-së, Monika Kryemadhi, e cila në fjalën e saj para ndërtesës së Kuvendit, theksoi se e vetmja zgjidhje e opozitës është rrëzimi i Edi Ramës dhe që nga nesër e tutje mediat do të kenë lajme pafund, duke paralajmëruar kështu përshkallëzim të aksionit opozitar.
Sipas saj, opozitës deri më tani i është vënë damka si “zjarrfikëse” e protestave, por kjo nuk do të ndodhë më.
