Emri Vata, një ndër drejtuesit e policisë së shtetit në qeverisjen e Berishës ka reaguar për mënyrën se si u dorëzua Klement Balili në polici. Ai gjithashtu ka drejtuar operacionin e vitit 2006, kur Balili u arrestua së bashku me dy policë të Komisariatit të Sarandës, gjatë një tentative për trafikimin e një sasie prej 750 kg kanabis drejt Greqisë.
Ish-drejtuesi i lartë i Policisë, Emri Vata në një prononcim për TCH tha se shoqërimi i djeshëm i Klement Balilit nga drejtori i Policisë së Shtetit, Ardi Veliu është i paligjshëm.
“Vetëdorëzimi njihet si praktikë policore, por vetëm në kushtet e flagrancës. Në këtë rast nuk ka as operacion, as vetëdorëzim, ka vetëm paraqitje. Dje, Policia e Shtetit ka bërë vetëm sigurimin fizik të personit, nga Delvina në Tiranë, si polici private”, u shpreh Emri Vata.
Kryeministri i vendit Edi Rama dhe Ministri i Brendshëm, Lleshaj e quajtën vënien e Balilit në dispozicion të drejtësisë si një operacion të suksesshëm. Më pas në media, nipi i Balilit tha se kishte kryer negociatat me drejtorin e Përgjithshëm të Policisë së Shtetit Ardi Veliu për dorëzimin e Balilit. Kujtojmë se ky i fundit shkoi vetë në Delvinë për të marrë me makinë private Klement Balilin dhe për të sjellë në Tiranë.
