Kryetari i grupit të PS, Taulant Balla i kërkoi Presidentit Meta publikisht të shpallë dekretin për ministrin e Jashtëm deri në orën 17:00 kohë kur parlamenti mblidhet në seancë të jashtëzakonshme për votimin e ministrave. Siç dihet Rama ka çuar emrin e tij në Presidencë për ministër i Jashtëm, pasi Meta i refuzoi Gent Cakën.
“Besoj që deri në orën 17:00 edhe zoti Meta do t‘i ketë dhënë fund një historie të pakuptimtë të krijuar artificialisht dhe që në gjitha ministritë të vijojë puna. Besoj që shumë shpejt kjo çështja e të drejtës së shpikur nga vetvetja e Presidentit për t’i hequr Kuvendit të Shqipërisë që është institucioni më i lartë në vend të drejtën për t’u shprehur do të zgjidhet nga Gjykata Kushtetuese”, u shpreh Taulant Balla teksa ishte në Elbasan për prezantimin e Prefektit.
Ndërsa Presidenti i vendit replikoi në distancë duke bërë ironi me numrin II të PS-së.
“Kush eshte Balla? Kryetari i Keshillit te mbrojtjes kombetare?”, u shpreh Meta, pas konferencës me titull “Politika e mirë në shërbim të paqes” e zhvilluar në Universitetin Katolik “Zonja e Këshillit të Mirë”.
