Klement Balili ka kaluar 24 orët e para në qelinë e paraburgimit, pas dorëzimit që bëri ditën e djeshme në Policinë e Shtetit.
Burime pranë Opinion.al bëjnë me dije se Balili është transferuar ditën e djeshme rreth orës 14.00 nga Komisariati nr.6 në Tiranë në ambientet e Drejtorisë së Policisë Tiranë.
I ashtëquajturi “Eskobari i Ballkanit” pritet të dalë nesër përpara Gjykatësit Paraprak, i cili do të vlerësojë nëse ka apo jo prova të mjaftueshme dosja hetimore për ta mbajtur Balilin në burg.
Gjykatësi Paraprak është një koncept i ri në kuadër të Reformës për Drejtësi.
Nëse Gjykatësi Paraprak vlerëson se dosja hetimore ka prova të mjaftueshme qe implikojnë Balilin në trafikun ndërkombëtar të lëndëve narkotike, atëherë ky gjykatës formulon akuzat që do të ngrihen ndaj tij.
Më tej do jetë Gjykata e Krimeve të Rënda ose edhe e Themelit në Tiranë e cila do të gjykojë çështjen e Klement Balilit.
Deri më tani nuk ka një orar se kur Balili do të dalë ditën e nesërme përpara Gjykatësit Paraprak.
Ndërkohë që pritet me interes se si do të shkojë gjykimi i njeriut që deri dje paradite ishte më i kërkuari në Shqipëri.
