Komisioni i Pavarur i Kualifikimit ka shkarkuar nga detyra kryetarin e Gjykatës së Kurbinit, Alfred Gjoni. KPK ka vendosur ta shkarkojë kryegjyqtarin, duke e gjetur të papërshtatshëm për vijimin e detyrës.
Kjo pasi nga verifikimet e kryera në kuadër të procesit të vetingut, gjyqtari Gjoni ka rezultuar me probleme me pasurinë, duke mos justifikuar dot të ardhurat për blerjen e një apartamenti për 60 milionë lekë të vjetra dhe mobilimin e tij, për afro 20 milionë lekë.
Po ashtu ai ka blerë edhe një apartament tjetër, për të cilin nuk arrin që të provojë se si janë siguruar të ardhurat.
Ndër të tjera rezulton se sa i takon anës profesionale, ai i ka zvarritur çështjet gjyqësore deri në katër vjet.
Po sot KPK konfirmoi vijimin në detyrë, të prokurores së Prokurorisë së Përgjithshme, Alma Muça.
