Kryetari i shtetit shqiptar, Ilir Meta ka pritur sonte në Presidentë kreun e Vetëvendosjes Albin Kurti, i cili është i rreshtuar në frontin opozitar në Kosovë. Meta thotë se Vetëvendosje është forcë kryesore politike në Kosovë dhe duhet të marrë pjesë në dialogun me Serbinë.
Deklarata e plotë e Presidentit Meta në facebook:
Kënaqësi e veçantë të prisja sot në mbrëmje në një takim të veçantë liderin e Vetëvendosjes, Albin Kurti. Forcimi i bashkëpunimit midis dy vendeve tona në interes të përbashkët dhe të forcimit të perspektivës europiane jo vetëm të Shqipërisë e të Kosovës, por të gjithë rajonit tonë ishte temë kryesore.
Në këtë drejtim theksova rëndësinë e dialogut Kosovë-Serbi që t’i shërbejë të ardhmes europiane të të dy vendeve dhe konsolidimit të bashkëjetesës e paqes në rajon. Vlerësova se Vetëvendosja si forcë kryesore politike duhet të luajë rol të rëndësishëm për forcimin e shtetit të Kosovës dhe arritjen e konsensusit të plotë për një dialog të suksesshëm dhe të qendrueshëm me Serbinë.
