Kreu i opozitës, Lulzim Basha, ishte sërish mbrëmjen e sotme në krahë të banorëve të Unazës së Re.
Ai tha se opozita do të mbështesë qëndresën qytetare kundër kësaj bande hajdutësh.
Sipas tij, falë qëndresës qytetare dhe asaj të studentëve, askush nuk është duke rënë më pre e propagandës.
‘Përsëris edhe njëherë vendosmërinë time dhe të gjithë opozitës për t’u qëndruar në krahë qytetarëve në kauzën e tyre. Sot është kauza e të gjithë shqiptarëve të cilët nuk pranojnë vjedhjen dhe poshtërimin. Ftoj mediat të bëjnë detyrën e saj, dhe të mos bëhen pjesë e mashtrimeve qeveritare. Studentët me qëndresën e tyre kanë treguar një të vërtetë të madhe, që kur studentët i thyen hundët qeverisë, nuk ka më njeri të hajë çorbën e propagandës’, – tha Basha.
Më tej, Basha sulmoi ashpër për të disatën herë qeverinë ‘Rama’ në lidhje me projektin e Unazës së Re për devijimin e lumi të Lanës.
Teksa qëndronte përkrah protestuesve, lideri opozitar tha se ky projekt u zhvendos në favor të një trafikanti droge. Po ashtu ai tha se ndryshimi i projektit erdhi me vendim dhe firmë të kryeministrit Edi Rama dhe kryetarit të Bashkisë Erion Veliaj.
“Edhe sot disa media thonë; sipas PD. Por nuk duhet të bëjnë mediat këtë? Por vetëm PD? I ftoi këto media që të hetojnë. Të hetojnë; ja si prishen shtëpitë e banorëve. Këto nuk janë gjëra të PD, por të vërtetat e këtij projekti. Ky projekt i hap rrugën pronës së tjetërsuar nga një trafikant droge. Media duhet të hetonte këtë aferë, dhe mos të behën pjesë e mashtrimeve, por ti tregojnë shqiptarëve se si është tjetërsuar rrjedha e një lumi. Ai i ka paguar 1.5 mln euro ministrisë së Ahmetajt. Mesazhi i dytë që kam për sot është; e dëgjuat si tha Rama; do kap edhe protestën. Siç ka kapur të gjitha. Jam i sigurt që studentët e kanë dëgjuar, dhe ata janë të bindur se nuk i kap kush. Ai duke kapur median, drejtësinë. Mësimi i qëndresës tek Unaza e Re, është se nuk ia ka dalë dhe s’do t’ja dalë. Unaza e Re ia theu hundën kësaj propagande mashtruese. Ai nxori në pah një të vërtetë. Po heton dhe Amerika, abuzimet e Ramës, Damian Gjinkurit e Ahmetaj, me pastrimin e parave në parajsa fiskale. Për 5 vite vegla e sundimit në vend, kanë qenë mashtrimi. Që kur u ngritën dhe studentët, iu thyhen hundën për herë të dytë kësaj qeverie. Ndaj ata ministra i pret burgu”, tha Basha.
