Studentët e Universitetit të Tiranës kanë nisur të grumbullohen përpara korpusit universitar, ndërsa mësohet se tashmë kanë përgatitur edhe itinerarin e marshimit të ditës së sotme. Sikurse ka raportuar gazetarja Klodiana Lala, pritet që nga korpusi universitar studentët protestues të hyjnë në zonën e Bllokut për të devijuar Kryeministrinë ku është parashikuar një protestë e PArtisë Demokratike, të cilën me sa duket studentët kanë vendosur ta shmangin.
Laladisa herë theksoi në raportimin e saj se studentët nuk kanë një drejtues, por së bashku diskutojnë dhe marrin vendimet për ecurinë e protestës. Ata sot do të vijojnë të jenë përpara Ministrisë së Arsimit, ku pritet t’u bashkohen edhe studentët e universiteteve të tjera.
Por studentët, në mënyrë absolute kanë bërë thirrje për ta mbajtur politikën larg protestës së tyre. Në Facebook, në faqen “Për universitetin” gjendet mes të tjerash edhe ky njoftim:
Nesër, ora 09:30, sa më të shumtë e të bashkuar para Korpusit, te sheshi ”Nënë Tereza”! Në këto ditë pushimi, prindër, familjarë. të afërm, gjimnazistë, mësues, pedagogë e çdo qytetar, duhet të jenë përkrah studentëve! Deri në protestën vendimtare të 11 dhjetorit, kur masa e madhe studentore kthehet në Tiranë, prej të cilës ministria e qeveria duhet të mendohen mirë nëse nuk i plotësojnë kërkesat në mënyrë të menjëhershme!
Larg duart e partive, afër duarve të solidaritetit me njëri-tjetrin!
Bashkohuni! Rezistenca nuk ndalet!
