Një çift të moshuarish u gjetën të vdekur mëngjesin e kësaj të premte në vendin e quajtur Pjeshkorja në lagjen “30 Vjetori” në qytetin e Beratit. Viktimat janë Kujtim dhe Këze Agalliu, 70 vjeç. Në fillim u dha se ata janë vetëflijuar, duke u hedhur nga kati i 8 i pallatit ku banonin, por më pas dëshmitarët në vendin e ngjarjes kanë sqaruar policinë se “burri hodhi gruan e më pas ra edhe vetë nga ballkoni”. Të dy mbeten të pajetë në oborrin e pallatit.
Ata ishin prindër të 4 fëmijëve, 3 djem e një vajzë që jetojnë të gjithë në emigracion. Të moshuarit ishin të sëmurë, thanë fqinjët. Ata kishin ardhur të banonin në shtëpinë e re në fillim të qershorit. Fëmijët e tyre u kishin blerë apartamentin në pallatin ende të papërfunduar, për ti larguar nga fshati Qerreshnik. Madje u kishin vënë në dispozicion dhe një grua që herë pas here kujdesej për ta. Por si duket të moshuarit ishin lodhur nga sëmundjet. Një burim nga policia i tha ABC News se burri vuante nga probleme mendore prej dy vitesh, kurse Këzja kohët e fundit po ekzaminohej me dyshimin se kishte tumor.
Të afërmit e tyre i thanë policisë se kohët e fundit bisedat e tyre lidheshin vetëm me fshatin nga ku kishin ardhur. Për këtë tragjedi policia ka nisur hetimet nëse ishte një akt vetëvrasjeje, apo burri që dyshohet i sëmurë vrau gruan dhe veten.
