Gazetari i emisionit ‘Opinion’, Dritan Laci, të enjten, në një lidhje të drejtpërdrejt nga ‘Unaza e re’, deklaroi se protesta e banorëve të zonës së “Astirit” që kundërshtojnë shembjen e mbi 600 objekteve që parashikohet të prishen për t’i hapur rrugë ndërtimit të një autostrade urbane nga Sheshi Shqiponja deri te Pallati me Shigjeta, ka hyrë sot në ditën e 12-të.
Gazetari tha se ka pak minuta që është ndezur protesta tek Unaza e re në ditën e 12 të saj. Kjo është një protestë me pak njerëz, por edhe pse një pjesë e protestuesve janë shoqëruar në komisariat.
Nga ana tjetër, një qyetetar i lidhur drejtpërdrejt për emisionin ‘Opinion’ tha se qytetarët e Unazës së re nuk janë kundër projektit, por kërkojnë dëmshpërblim të plotë sipas vlerës së tregut.
Ai tha se nuk bëhet fjalë për 300 banesa, por mbi 600 të tilla, pasi kërcënohet nga dy projekte zgjerimi i Unazës së Re dhe devijimi i lumit Lana.
Sipas tij, kërkesat e banorëve janë shumë të thjeshta, legalizim dhe dëmshpërblim me vlerën e tregut dhe jo me çmimin e referencës së kësaj qeverie.
Banori: Z.Fevziu ka shumë nga këta banorë që e kanë emrin në VKM për legalizim dhe për kalimin e parcelave që këta banorë kanë shtëpitë, kjo jo për fajt të tyre, por të qeverisë. Projekti i Lanës është devijuar për të favorizuar një biznes. Ne kërkojmë legalizim dhe kompensim të plotë. Ne kemi marrë vetëm heshtje dhe tallje nga qeveria dhe kryetari i Bashkisë së Tiranës. Nuk është tallje kjo që na është thënë se do na japin bonus qiraje për tre vite.
Z.Blendi ne pak a shumë jemi të gjithë njësoj. Të gjitha ata që kanë arritur të bëjnë një legalizim e dinë ata si e kanë arritur. Duhet të marrë fund njëherë e përgjithmonë kjo histori, aty ku dëmtohemi duhet të zhdëmtohemi. Në vitin 2014 qeveria Rama nxori një ligj që ndalon ndërtimet pa leje, nga ajo ditë e deri tani, nuk është bërë asnjë ndërtim pa leje. Në vitin 2005 qeveria Berisha nxori ligjin për legalizimin e ndërtimeve informale. Unë nuk flas personalisht, ne jemi të gjithë të bashkuar për një qëllim.
