Një gjykatës francez ka vendosur sot katër persona, përkrahës të ekstremit të djathtë, nën një hetim zyrtar mbi akuzat terroriste pak ditë pas arrestimit të tyre në lidhje me një komplot “të dhunshëm” kundër presidentit Emmanuel Macron.
Katër personat të moshës 22-62 vjeç, janë në mesin e gjashtë personave të arrestuar të martën në pjesë të ndryshme të Francës nga Shërbimin e Sigurimit të Brendshëm Francez, DGSI.
Të arrestuarit janë akuzuar për komplot terrorist dhe posedim të paligjshëm të armëve në lidhje me një organizatë terroriste, tha një burim nga gjykata.
Të katër janë ndaluar. Të gjithë ata janë përshkruar si “mbështetës të ekstremit të djathtë” dhe ishin mbajtur prej kohësh nën përgjim nga agjentët e Drejtorisë së përgjithshme për sigurinë e brendshme.
Në bisedat e tyre telefonike, anëtarët e këtij grupi i ishin referuar planeve të ndryshme, duke përfshirë një sulm ndaj Presidentit francez.
Kërcënimet u konsideruan mjaft serioze për të filluar më 31 tetor një hetim paraprak nga autoritetet ndjekëse që çuan në finalizimin e operacionit të arrestimeve të martën.
Hetuesit kanë përshpejtuar arrestimet pasi kanë mësuar se një nga burrat, Jean Pierre Buige do të shkonte “në lindje të Francës” me 11 nëntor ku edhe Macron do të ishte atje për të përkujtuar 100-vjetorin e armëpushimit në Francë.
62-vjeçari në pension kishte një llogari në Facebook ku denonconte “direktivat evropiane”,
“emigracionin masiv” dhe “ngritjen e Islamit”./OraNews/
