Ka përfunduar pa marrëveshje të enjten takimi mes Presidentit të Kosovës, Hashim Thaçi dhe homologut të tij serb, Aleksandër Vuçiç në Bruksel.
Pas takimit, Vuçiç u është përgjigjur me nervozizëm pyetjeve të gazetarëve, në një takim që është mbajtur nën kujdesin e Federica Mogherini.
Vuçiç u shpreh se Serbia është e hapur për dialog, por edhe pala tjetër duhet të respektojë marrëveshjet.
Në një pjesë të madhe të diskutimit të tij, Vuçiç shprehu kritika për vendimin e Qeverisë së Kosovës për vënien e taksës prej 10% për mallrat që vijnë nga Serbia dhe Bosnja.
“Çfarë janë në gjendje të respektojnë shqiptarët nëse nuk janë në gjendje të respektojnë marrëveshjet të cilat i kanë nënshkruar para 10 vitesh”, – thaVuçiç.
Nga ana tjetër, Presidenti i Kosovës është shprehur se takimi ishte i vështirë me Vuçic për shkak të diskursit të tij agresiv dhe arrogancës së shprehur.
“Diskursi ishte agresiv dhe arrogant nga Serbia dhe Vuçiç derisa diskursi ynë ishte i argumenteve dhe i anës së drejtë për arritjen e një marrëveshje të balancuar që do të nënkuptonte njohjen reciproke dhe hyrjen në OKB dhe zëvendësimin e rezolutës 12/44’, -tha Thaçi.
Thaçi tha se takimi i radhës do të mbahet së shpejti dhe shpreson në arritjen e një marrëveshje finale.
