Instituti Shtetëror Teknik dhe Industrial ka fshirë nga sistemi të gjitha gjobat administrative të vendosura ndër vite.
Lajmi u publikua të martën në emisionin ‘Opinion’ nga gazetarja investigative Fatjona Mejdini, e cila deklaroi se të vetmet gjoba që dalin prezente janë ato të vendosura nga prilli i këtij viti deri në shtator.
Në lidhje me faktin në fjalë, Mejdini tha se një gjë e tillë mund të verifikohet lehtësisht, mjafton të klikohet në website-in zyrtar të institucionit.
Ajo ishte e ftuar në lidhje me një investigim të realizuar për cilësinë e naftës në vendin tonë.
Ku rezultatet e këtij investigimi, tregonin që kompanitë më të rëndësishme të shpërndarjes së naftës në vend rezulton se tregtojnë në pjesën dërrmuese gazoil të përzier me solar apo vajguri, në një kohë kur rafinimi i produktit nuk bëhet i plotë.
Nga ana tjetër, për specialistin e naftës dhe gazit, Nako Petro një rezultat i tillë është i pamundur dhe analizat nuk e tregojnë saktësisht nivelin e naftës në vend. Duke mos rënë aspak dakord me përfundimin e gazetarëve në lidhje me cilësinë e naftës në vendin tonë.
