E enjta si gjithnjë pritet të jetë një ditë e ngjeshur me aktivitete politike. Kështu në orën 10:00 është njoftuar seanca plenare në parlament, ku do të jetë vetëm mazhoranca. Në rendin e ditës është dekreti i Metës për lojërat e fatit dhe pr/ligji për dëmshpërblimin e ish-të përndjekurve. Ndërsa opozita e bashkuar ka njoftuar se mbledhjen e radhës do ta zhvillojë në qytetin e Durrës. Kështu në orën 10:00, Lulzim Basha pritet tu flasë qytetarëve nga qyteti bregdetar, ndërsa mazhoranca qeverisëse do të diskutojë e vetme ligjet në parlament.
Kujtojmë se në fund të korrikut, Presidenti Meta e ktheu në Parlament ligjin e miratuar nga shumica për lojërat e fatit, duke e arsyetuar me uljen e barrës fiskale për këtë biznes, duke kujtuar se në këtë mënyrë do të stimulohej më shumë kjo industri.
Ndryshe nga ky arsyetim i Presidentit në Komisionin e Ekonomisë në Kuvend, ministri Arben Ahmetaj sqaroi se ligji nuk ndryshon tatimin mbi fitimin për kompanitë e basteve, por rrit taksimin për Lotarinë Kombëtare, duke e çuar nga 10 në 15%.
Sakaq, që në nisje të kësaj legjislature, opozita ka deklaruar se do të jetë në qytetet e mëdha të vendit për të denoncuar lidhjet e pushtetit me krimin. PD dhe LSI kanë zhvilluar mbledhje në Shkodër dhe Elbasan, ndërsa sot kanë lajmëruar se do të jenë në Durrës. /Opinion.al
