Ulsi Manja, kryetari i Komisionit të Ligjeve është përfshirë në debatin për audio-regjistrimin e publikuar dje mes n/kryetarit të KQZ Denar Biba dhe gjyqtarit të Strasburgut, Ledi Bianku. Socialisti Manja thotë se ky audiopërgjim është “Babalja 2”. Kujtojmë se për Babalen, hetimet nuk kanë patur asnjë rezultat (deri tani). Akoma pas tre muajsh prokuroria nuk ka vertetuar nëse zëri në audio-regjistrim është i Agron Xhafës, vëllait të ministrit të Brendshëm. Por, kjo nuk e ndal Ulsi Manjën të akuzojë opozitën se po i monton këto audio.
Manja deklaroi se opozita po publikon përgjime të cilat më parë janë montuar dhe po i përdor sipas interesave.
“Opozita e sotme, dje në pushtet, e di shumë mirë çështjen e pronave dhe detyrimet e qeverisë shqiptare, sipas vendimit-pilot të Gjykatës së Strasburgut. Basha po zhytet thellë e më thellë në ujin e ndenjur ku e ka futur opozitën shqiptare. Na ka zënë taksirati që kur Basha ka marrë detyrën e specialistit të audio-përgjimeve”, deklaroi deputeti socialist njëherësh kryetar i komisionit të Ligjeve.
Ai shtoi se kjo ishte më qesharake se ajo e Babales.
“Ishte “Babalja 2” e PD. Kjo e djeshmja është prova më e sigurt se kur mendon që opozita preku fundin s’ke parë gjë akoma. Dy miq flasin në kafe në 2014 dhe na del një audiopërgjim me fjali të shkëputura ku i bëka fjalë për shantazh ndaj gjykatësit në Strasburg”, deklaroi Ulsi Manja.
