Shërbimi Informativ Shtetëror ka reguar sot, lidhur me përmendjen publike të këtij insituticioni lidhur me rastin e gjyqtarit Shkëlzen Selimi, i cili u akuzua mediatikisht se kishte favorizuar persona të inkriminuar. Provat e bëra publike ndaj tij, i referoheshin institucionit të shërbimit informativ.
Nderkohe, tre ditë më parë Shkelzen Selimi, në seancën dëgjimore para Komisionit të Pavarur të Kualifikimit, kerkoi pezullimin e mbledhjes, me pretendimin se ky institucion i kishte servirur medias një dokument të SHISH të vitit 2011.
Lidhur me këtë ngjarje, SHISH, përmes kabinetit të drejtuesit të këtij institucioni bën me dije se përdorimi i emrit të shërbimit dhe referimi për format e metodat e punës së tij, sjellin një cënim të ndjeshëm të aktivitetit të komunitetit të inteligjencës
NJOFTIM PER SHTYP I SHISH
Shërbimi Informativ i Shtetit shpreh shqetësimin e thellë për rastet e përsëritura të pasqyrimit në media të informacioneve apo të dhënave që pretendohet se u referohen dokumenteve të hartuara nga SHISH-i ndër vite. SHISH-i i bën me dije opinionit publik se nuk ka asnjë koment specifik për autenticitetin e dokumenteve të pretenduar të inteligjencës.
Megjithatë SHISH-i nënvizon me forcë se përdorimi i emrit të Shërbimit dhe referimi për format e metodat e punës së tij, me synimin për të siguruar besueshmëri të shtuar të deklaratave apo akuzave në media dhe opinionin publik, sjellin një cënim të ndjeshëm të aktivitetit të komunitetit të inteligjencës. Ato rrezikojnë të ndikojnë aftësinë e Shërbimit Informativ për garantimin e sigurisë kombëtare.
Shërbimi Informativ i Shtetit vlerëson se çdo shkelje në administrimin e informacionit të klasifikuar, kudo ku ajo ndodh, mund të dëmtojë rëndë punën dhe të ekspozojë punonjësit e Shërbimit përballë rreziqeve të paparashikuara. Shërbimi Informativ i Shtetit thekson se ligjshmëria, objektiviteti dhe sekreti janë parimet bazë të punës së tij. Në këtë kuadër, SHISH-i mbetet i angazhuar të zbatojë me rreptësi procedurat dhe rregullat ligjore gjatë prodhimit, qarkullimit, administrimit, shfrytëzimit, transportimit, transferimit, arkivimit, shumëfishimit, riprodhimit e asgjësimit të informacionit “sekret shtetëror” të çdo lloji.
SHISH-i sjell në vëmendje se, në bazë të ligjit, është organ informativ dhe nuk kryen veprimtari të karakterit ushtarak ose policor, por në funksion të sigurimit kombëtar informon institucionet e larta shtetërore e bashkëpunon me agjenci informative e institucione shtetërore brenda dhe jashtë vendit. Në këtë kuadër, SHISH-i do të vazhdojë bashkëpunimin me organet ligjzbatuese, me qëllim mbrojtjen e sigurisë së veprimtarisë së vet, metodave dhe burimeve tëinformacionit nga ndërhyrjet e paautorizuara.
KABINETI
