Aktori i dashur për shqiptarët, Robert Ndrenika ishte renditur ndër të parët kundër shembjes së Teatrit Kombëtar dhe hapjes rrugë të ndërtimit të tij me PPP. Por sëfundmi u tha se aktori ka ndryshuar mendje, dhe për këtë u kritikua në media.
Vetë ai ka sqaruar pozicionin e tij, tashmë që është bërë fakt shembja e teatrit, pasi qeveria e kaloi të enjten ligjin në parlament që i hap rrugë marrëveshjes me firmën “Fusha sh.p.k”.
“Ju lutem mos më kryqëzoni” e nis reagimin e tij Ndrenika duke iu drejtuar pikërisht atyre që sot e kritikojnë pse ai do që të ndërtohet një teatër i ri. Më tej, ai thotë se i është dhënë besa e shqiptarit se nuk do të tjetërsohet prona shtetërore e teatrit.
Statusi i plotë i Ndrenikës
Ju lutem… mos më kryqëzoni! Për dijeni mikeshës sime, gazetares Fatmira Nikolli, por le ta dijë dhe ‘tan bota mbarë’! Kam qenë (prej vitesh) dhe jam për një Teatër Kombëtar të ri dhe bashkëkohor, të cilin e ka për Detyrë ta bëjë shteti shqiptar (paratë le t’i marrë ku të dojë, ndoshta dhe atje ku i merrte Josif Broz Tito)! Këtë gjë nuk e kam mbajtur të fshehtë, por ua kam bërë të ditur prej kohësh kolegëve të mi, por kur ka qenë rasti dhe në opinionin publik. I vetmi lëshim që kam bërë ditët e fundit është se kam pranuar PPP me kushtin e vetëm që përveç godinës (teatër) që do të ndërtohet në favor të PPP nuk do të lëshohet asnjë cm katror nga TOKA e TEATRIT KOMBËTAR! Të kanë gënjyer do të thotë dikush dhe unë përgjigjem po BESA e shqiptarit ku vete? Së fundi, ju bëj të ditur se nuk jam JEZU KRISHTI bile as BARRABA dhe gojën nuk e kam vetëm për të ngrënë kos (pa yndyrë) dhe të pi ilaçe, por e kam edhe për të FOLUR!. Me respekte të ndërsjella, Robert Ndrenika
