Një ngjarje që mund të përfundonte në tragjedi, është parandaluar ditën e sotme nga policia në Kukës. Mësohet se një 30-vjeçar ka tentuar të vrasë për motive xhelozie, të dashurin e gruas së tij, një 23-vjeçar.
Policia e Kukësit në një njoftim për mediat bën me dije se ka vënë në pranga një person që ka tentuar të vrasë më armë zjarri për motive xhelozie të dashurin e bashkëshortes, shtetasin me inicialet K.K.
Policia ka arritur në kohë të parandalojë ngjarjen e rëndë duke arrestuar në flagrancë 30 vjeçarin. Në cilësinë e provës materiale, Policia sekuestroi një armë zjarri kallashnikov me 19 fishekë.
Specialistët Kundër Krimit ndaj Jetës dhe Lirisë së Personit, në Drejtorinë Vendore të Polciisë Kukës bënë arrestimin në flagrancë të shtetasit të quajtur Dorian Idrizaj, 30 vjeç, banues në Tiranë.
Arrestimi i tij u bë pasi, shtetasi Dorian Idrizaj ka shkuar në banesën e shtetasit K.K, në lagjen Nr.1, Kukës, ku prej disa ditësh shtetasi K.K bashkëjetonte me shtetasen E.A, ( bashkëshortja e shtetasit Dorian Idrizaj), dhe pas një konfikti verbal mes të dyve, shtetasi Dorian Idrizaj për motive xhelozie ka kanosur dhe tentuar të vrasë me armë zjarri shtetasin K.K.
Gjithashtu, ndaj Idrizaj, u referuan materialet edhe për veprën penale “Shfrytëzim prostitucioni”, pasi dyshohet se në Kosovë, keqtrajtonte dhe shfrytëzonte për prostitucion në lokale nate bashkëshorten e tij, shtetasen E.A.
Materialet do ti kalojnë Prokurorisë së Rrethit Gjyqësor Kukës, për veprat penale “Kanosja”, “Prodhimi e mbajtja pa leje e armëve luftarake dhe municionit” dhe “Shfrytëzimi i prostitucionit”, parashikuar nga nenet 84, 278 dhe 114 të Kodit Penal.
