Të rinjtë e FRPD-së, të mërkurën pasdite, kanë zhvilluar një protestë simbolike përpara Ministrisë së Brendshme, duke kërkur dorëheqjen e Fatmir Xhafajt.
Protesta ka nisur duke prezantuar fillimisht një video-montazh të Fatmir Xhafajt, Saimir Tahirit, grupit të Habilajve dhe Kryeministrit Edi Rama, të cilët i krahasojnë me serialin “Narcos”, që flet për jetën e trafikantit Pablo Escobar.
“Narcos de Albania” është titulluar ky video-montazh, ndërsa pasqyrohen ato që quhen “klanet Xhafaj” dhe “klanet Habilaj”.
Në krye të tyre, sipas FRPD-së, qëndron kryeministri Edi Rama.
Kreu i FRPD-së, Bleind Këlliçi tha se ndërkombëtarët na kanë zili me aktorët tanë që kemi në këtë serial, ndërsa shtoi se ne jemi për një Shqipëri për hapjen e negociatave, por pa Edi Ramën, Fatmir Xhafajn, Agron Xhafajn, Saimir Tahirin dhe të gjithë kriminelët.
Këlliçi tha se protesta e të rinjve dhe qytetarëve do të vazhdojë derisa Fatmir Xhafaj të largohet nga posti i ministrit të Brendshëm.
Ndërsa kryetarja e LRI-së, Floida Kërpaçi, tha se sot jemi edhe më shumë të motivuar për ti çuar një mesazh Edi Ramës që të largohet sa më shpejt nga Shqipëria.
“Dua të dënoj shumë fort aktin e sotëm për proçedimet e të rinjve që protestuan. Nuk do të ndalemi në protestat dhe do të kërkojmë të drejtat tona. Ne e duam integrimin europian, që po na e largon Edi Rama me realitetin që ka krijuar”, tha Kërpaçi.
