Po vazhdon në Gjykatën e Krimeve të Rënda seanca për rivlerësimin e masës së sigurisë për ish-ministrin e Brendshëm, Saimir Tahiri. Të shtunën Gjykata vendosi arrest shtëpie (në mungesë) me akuzën e trafikut të narkotikëve dhe korrupsion të zyrtarëve të lartë. Sot, Tahiri është prezent në sallën e gjyqit, ku pas pak pritet të merret vendimi nëse do vazhdojë të qendrojë në arrest shtëpie apo në burg.
Në fjalën e tij, Saimir Tahiri ironizoi masën e dhënë. “Ju keni thënë për mua arrest shtëpiak po për mua është njësoj si arrest shtëpiak e si arrest me burg”, ka thënë Tahiri përpara gjyqtares Liliana Baku.
Sakaq ai është shprehur: “Ju argumentoni se unë kam aftësi të prish e dëmtoj provat, kjo nuk është e vërtetë dhe është e pamundur. Këtë argumentim e keni dhënë dhe më herët në vendimin kur shpallët bllokimin e pasaportës. Ju po ndiqni të njëjtin kriter si kur isha deputet dhe tani qytetar i lirë. Ju thoni se ekziston rreziku i ikjes, nuk ka asnjë mundësi që unë të largohem. Gjatë kohës që më është kthyer pasaporta kam lëvizur disa herë jashtë vendit dhe jam kthyer sërish në Shqipëri. Unë mandatin e dorëzova vullnetarisht dhe jam i hapur për drejtësinë dhe për të parë drejtësinë në sy”.
Pamje nga seanca
