Kryeministri Edi Rama ishte i ftuar mbrëmë në “Top Show” pikërisht në ditën kur në Shqipëri kishte zbritur Izet Haxhia. Ai njihet si një nga njerëzit që ka sulmuar më së shumti ish-kryeministrin Sali Berisha. Nga Turqia ku ndodhej në arrati ish-truproja e Berishës ka akuzuar ish-shefin e tij për vrasjen e Azem Hajdarit dhe krime të tjera të supozuara. Tashmë Izet Haxhia është ekstraduar, dhe do të vuajë dënimin me 25 vite burg për vrasjen e Azem Hajdarit.
Nga ana tjetër avokati i tij ka pretenduar se rigjykimi për këtë ngjarje të madhe do të hapet. Kjo mbetet për tu parë! Sakaq në media është folur se ekstradimi i tij u bë në bazë të një marrëveshje Rama-Erdogan për të sjellë në Shqipëri “armikun” e Berishës. Kësisoj Edi Rama nuk i shpëtoi dot mbrëmë kësaj pyetje të Dudushit, por ai mohoi gjithçka, madje me ironi tha: “Për fat të mirë ai nuk ka qenë badigardi im”
Deklarata e Ramës mbrëmë në Top Show: “Eshtë tërësisht qesharake për t’u menduar që unë mund të investohem për të sjellë në Shqipëri nje person, që nuk e shoh që prej vitit 1992. Për fat të mirë që nuk ka qenë badigardi im. Unë jam tërësisht jashtë kësaj çështjeje, pasi i përket drejtësisë. Ai person, nëse ka diçka për të vërtetuar, le ta bëjë, ndërsa nëse i ka pasur vetëm fjalë, të heshtë”.
/Opinion.al
*Izet Haxhia, foto e policise nga mberritja e tij ne Rinas
