Dy persona me rrezikshmëri të lartë janë arrestuar sot në Tiranë. Ata ishin shpallur në kërkim për vepra të rënda penale, si plagosje dhe tentativë vrasje.
Policia e Tiranës njoftoi arrestimin e Deivid Shuaipi, 23 vjeç, banues në Tiranë. Shuaipi rezultonte i shpallur në kërkim për “Vrasje me paramendim e kryer në bashkëpunim, e mbetur në tentativë” dhe “Mbajtja pa leje e armëve luftarake dhe municionit”. Në shkurt të këtij viti, në rrugën “Pandeli Çale” në bashkëpunim me shtetas të tjerë, Deivid Shuaipi ka plagosur me armë zjarri shtetasit Gj. P., dhe R. H.
Personi i dytë i arrestuar është Rey Tahiri, 20 vjeç, banues në Durrës. Ai rezultonte i shpallur në kërkim për veprën penale “ Vrasje me dashje e mbetur në tentativë” dhe “Prodhim dhe mbajtja pa leje e armëve të ftohta”. Gjykata e Shkallës së Parë Tiranë kishte caktuar ndaj këtij shtetasi masën e sigurisë “Arrest me burg”, pasi në dhjetor 2017 në bulevardin “Gjergj Fishta” ka tentuar të vrasë me thikë shtetasin M. M.
