Ministrja e Arsimit, Lindita Nikolla e cila është edhe deputete e qarkut të Lezhës nuk e ka ditur se shkolla e Oroshit, Bashkia Mirditë (qarku Lezhë) është pa energji elektrike prej disa muajsh. Pas një “dushi të ftohtë” në publik nga prifti i zonës, Dom Genci, ajo ka reaguar duke vendosur masa disiplonore ndaj dy drejtorëve të Arsimit, por ama ende nuk ka mundur të sigurojë energjinë për këtë shkollë, që është ndër më të vjetrat në Shqipëri.
Denoncimi publik për mungesën e energjisë u bë gjatë një dëgjese në Lezhë në 4 Maj, ku merrte pjesë ministri i Brendshëm Fatmir Xhafaj dhe ambasadorja e BE, Romana Vlahutin. Në këtë takim, dom Genci i indinjuar iu drejtua ambasadores me fjalët se “a mund të shkojmë në BE me shkolla pa drita?”. Fjala e tij pati jehonë në media, ndaj sot ministrja Nikolla, reagon duke thënë:
“Ministria e Arsimit Sportit dhe Rinisë ka nisur procedimin disiplinor me motivacionin “Mospërmbushja e detyrave, mosmarrja e masave për situatën e krijuar nga mungesa e energjisë elektrike për një periudhë të gjatë në shkollën Orosh, që ka cënuar mbarëvajtjen e procesit mësimor”, ndaj Drejtorit të Drejtorisë Arsimore të Lezhës dhe Drejtorit të Zyrës Arsimore të Mirditës. Ndërkohë në komunikim zyrtar me OSHEE, MASR garanton se shumë shpejt situata në shkollën e Oroshit do të marrë zgjidhje”.
Deklarata e priftit:
Dom Genci: “E shoh edhe nga titulli ‘Siguria Publike’. Unë kam diçka për të thënë. Jam prift i Oroshit prej 3 vitesh e gjysmë. Atje është një shkollë e mirë me fëmijë të mrekullueshëm por në një territor të thyer, malor. Oroshi është një vend i cili që nga mesjeta dhe më heret ka hedhur dritë dhe kulturë, jo vetëm për Mirditën dhe më gjerë. Sot kjo shkollë nuk ka drita akoma. Duke biseduar me fshatarët një x person nuk i ka lejuar që të kalojnë linjën elektrike sepse është toka e tij, ara apo mali i tij.
Por jemi sot në 2018 dhe kjo shkollë ka rritur gjenerata të ndryshme pa energji elektrike. Por do ti them zj. Vlahutin: A mund të ketë integrim integrim të Shqipërisë në BE kur kemi akoma shkolla pa drita? A mund ti them z. Ministër se për kapriço të disa personave dënohen gjenerata dhe fëmijë të mrekullueshëm që të rriten pa dritë e pa ngrohje?
A mund të ketë një iniciativë nga ana e zyrës arsimore? Kam këtu edhe profesorin tim të nderuar Bardhok Pulaj që është pikërisht në këtë detyrë, në këtë funksion. A do të ketë njëlloj barazie midis qytetit dhe fshatit?
A janë të barabartë fëmijët e Oroshit përballë Ministrisë, përballë sigurisë publike, përballë të gjithë? A janë të barabartë me gjithë të tjerët? Kur do të mund të kenë drita dhe a mund të kenë drita ndonjëherë?
Denoncimi i kësaj ngjarje e vuri në siklet Drejtorin rajonal të arsimit Bardhok Pulaj i cili si drejtues i këtij institucioni nuk dinte gjë për këtë problem.
Bardhok Pulaj: “Meqë Don Genci është i ngarkuar për të sjellë dritën hyjnore ne do të përpiqemi. Dhe të garantoj që ajo shkollë, që është shkolla e parë e Mirditës, nuk e di që mund të jetë një shkollë pa drita sot sepse të garantoj se të gjitha shkollat e Mirditës janë rikonstruktura dhe unë do ta verifikoj.
Dhe brenda javës nëse ka pengesa për kalimin e rrjetit do të vijnë dritat në shkollën e Oroshit. Është një çështje shumë e thjeshtë, por unë nuk e dija që nuk ka drita. Sapo të dal nga mbledhja do të vendosen drita urgjent. Dhe besoj që kjo nuk do ta pengojë integrimin e Shqipërisë në Europë.
Ambasadorja Vlahutin vetëm sa përforcoi pretendimet e priftit, duke thënë se ka parë shkolla pa tualete dhe pa kushtet minimale në vendin tonë. Madje nënvizoi se kryetarët e bashkive nuk kanë pse të kenë makina të shtrenjta por të investojnë në shkolla.
Vlahutin: Për pjesën e shkollave, sigurisë dhe ndriçimit. Personalisht kam parë shkolla të cilat janë pa tualete. Shkolla të cilat janë në kushte të patolerueshme dhe të papranueshme, dhe unë do të këshilloja kryetarë bashkie apo ata që janë përgjegjës se nuk është e nevojshme për ta të kenë makina shumë të shtrenjta por është shumë e domosdoshme për fëmijët të kenë atë që u duhet për të pasur edukim.
