Policia ka zbardhur detaje të reja për automjetin e djegur në Fushë-Krujë, të shtunën, në afërsi të Borizanës, brenda të cilit u gjet një person i pajetë.
Sipas të dhënave paraprake nga policia, dyshohet se viktima është një shtetas kosovar, me inicialet Xh.O., që rezulton se është edhe pronari i mjetit.
Të njëjtat burime tregojnë se shtetasi kosovar ka dyshime që hyri në Fushë-Krujë ditën e djeshme, rreth orës 10:00, ndërkohë që në rrethana ende të paqarta mjeti është gjetur i djegur.
Policia ka shoqëruar disa persona si të dyshuar për ngjarjen, ndërsa bëhet me dije se po hetohet gjithashtu edhe itinerari i lëvizjes së mjetit.
Viktima ende nuk është identifikuar, pasi pritet që trupi i karbonizuar t’i nënshtrohet analizës së ADN-së.
Ngjarja:
Ngjarja e rëndë u raportua dje rreth orës 14:00. Ka qënë një person, banor në fshatin Borizanë ai që ka parë makinën teksa digjej. Pak minuta më pas në vendngjarje kanë shkuar zjarrfikësit e policia. Pasi janë shuar flakët, brenda saj është konstatuar kufoma e shkrumbuar e një personi të seksit mashkull.
