Kjo grua, nëna shqiptare e 3 fëmijëve të mitur të cilët nuk do i shohë më, jeton prej 18 vitesh në Shtetet e Bashkuara të Amerikës.
Por tani ajo po përballet me dëbimin nga vendi. Cile Precetaj ka jetuar në SHBA për shumë vite, ku dhe ka krijuar familjen me bashkëshortin Peter Gojcevis, të cilët kanë tre fëmijë, dy vajza dhe një djalë.
Mëngjesin e së enjtes (26 Prill), ajo zbuloi se duhet deportuar nga aty ku jeton për shkak të mungesës së dokumenteve.
Sapo mësoi këtë lajm, Cile Precetaj u dërgua në spital në gjendje të rënduar ankthi.
“Ajo mendonte se pësoi atak në zemër dhe qëndroi në spital për 2-3 orë“, thotë bashkëshorti i saj.
Precetaj është përballur me një situatë të tillë edhe në vitin 2013 për t’u dëbuar në Shqipëri, por një urdhër-ekzekutiv në vitin 2014 i mundësoi asaj qëndrimin.
Familja e saj dhe avokati thonë se Cile Precetaj është përpjekur për t’u bërë qytetare e ligjshme në Shtetet e Bashkuara të Amerikës.
Ata theksojnë se ajo nuk ka kryer asnjë krim në vend që kur shkoi në SHBA pa dokumente.
“Nëse mbledhim të gjitha paratë që kemi shpenzuar me avokat, është çerek milioni dhe të gjithë më premtojnë se do ta zgjidhin. Unë jam këtu me tre fëmijë që qajnë dhe një nënë që qan. Autoritetet thonë se ajo shkeli ligjin. Ajo erdhi këtu në mënyrë të paligjshme dhe tejkaloi qëndrimin në vend. Dakord, por mendoj se një ligj i madh po shkelet duke ndarë një familje”, shprehet Peter Gojcevic, bashkëshorti i Cile Precetaj.
Gjatë këtyre ditëve pritet një përgjigje nga autoritetet amerikane nëse gruaja shqiptare do të dëbohet nga vendi apo do të lejohet të qëndrojë.
