Ekspertët e ekonomisë kërkojnë që qeveria të marrë masa për të mos lejuar hyrjen në sektorët strategjikë kompani të regjistruara në parajsat fiskale, pasi institucionet nuk kanë mundësi të identifikojë pronarët e vërtetë të tyre.
Nisur nga rasti i mashtrimit të firmës Sun Petroleum Albania, e cila ka tregtuar naftë nën logon e Gulf, Zef Preçi, thotë se edhe kur kompanitë janë offshore, qeveria ka të drejtë të kërkojë të dhëna dhe garanci përpara licensimit të tyre.
Gjergj Buxhuku, administrator i Konfidustria-s, sqaron se në momentin që do të diheshin pronarët e vërtetë, atëherë organet hetimore do të bllokonin edhe pasuritë e personale të aksionerevë, për të dëmshpërblyer më pas qytetarët.
Një javë më parë, kompania e naftës Gulf mbylli të gjitha pikat e saj, ndërkohë që kishte shitur gjatë javëve të fundit mijëra litra naftë me tollona me çmim 40% më të lirë se tregu e duke mashtruar qindra qytetarë e biznese, të cilët nuk kanë marrë asnjë zgjidhje./tv Klan
