Trafiku i rënduar në zonën turistike të Shëngjinit do të marrë zgjidhje para sezonit veror, ku pritet të ketë një numër të madh pushesish.
Lajmi është konfirmuar nga nënkryetarja e Bashkisë Lezhë, znj.Alfrida Marku, e cila tha se situata e rënduar e trafikut do të zgjidhet para fillimit të muajit qershor.
Marku tregoi se do të zgjerohet kryqëzimi i superstradës me rrugën e Shëngjinit, e cila mendohet se do të çlirojë dhe trafikun.
“Në komunikimet që kryetari i bashkisë ka patur këto ditë me drejtues të Fondit Shqiptar të Zhvilimit, përpara fillimit të këtij sezoni, do të përfundojë projekti për përmirësimin e hyrjes së Shëngjinit – nga rrethrrotullimi pranë ish fabrikës së letres dhe deri tek segmenti i rikonstruktuar,- tha ajo.
(Foto: Nënkryetarja e Bashkisë Lezhë, Alfrida Marku)
Më tej, Marku u shpreh se do të realizohet edhe një riveshje me asfalt e rrugës kryesore brenda qytetit të Shëngjinit, deri tek porti.
Sipas saj, ky sezon veror do të jetë shumë efikas përsa i përket shërbimeve, higjienës dhe informimit të vizitorëve e turistëve.
“Bashkia Lezhë garanton të gjithë vizitorët dhe turistët se këtë sezon do të kemi një standard shumë më korrekt të menaxhimit të mbetjeve dhe furnizimit me ujë të pishëm”, – tha Marku.
Trafiku i rënduar në hyrje të qytetit bregdetar të Shëngjinit për pushuesit e shumtë dhe drejtuesit e automjeteve ka qenë një problem i përvitshëm gjatë gjithë sezonit veror, gati në të gjitha oraret e ditës dhe të mbrëmjes.
