Presidenti i Francës, Emmanuel Macron pranoi të martën se sulmet ajrore në Siri “nuk zgjidhin asgjë”, por thanë se Franca, Britania dhe Shtetet e Bashkuara ishin detyruar të sulmonin për të mbrojtur “nderin” e bashkësisë ndërkombëtare.
Sulmet me raketa nga SHBA, Britania dhe Franca në fundjavë ishin në përgjigje të një sulmi të dyshuar të gazit të klorit dhe sarinës në Douma më 7 prill, në të cilin thuhet se të paktën 40 vetë u vranë dhe qindra të tjerë u plagosën.
Macron tha se aleatët perëndimorë vepruan për të mbrojtur rregullat globale dhe akuzoi udhëheqësin sirian Bashar al-Assad se ishte “në luftë me popullin e tij”.
“Tre vende kanë ndërhyrë dhe më lejoni të jem shumë i sinqertë, mjaft i sinqertë – kjo është për nderin e bashkësisë ndërkombëtare”.
Ai tha se sulmet u zhvilluan “brenda një kornize të ligjshme dhe multilaterale dhe në një mënyrë shumë të shënjestruar pa asnjë viktimë njerëzore, asnjë viktimë të vetme njerëzore, për të shkatërruar tre vende ku ishin prodhuar apo përpunuar armë kimike”.
“Këto raketanuk zgjidhin domosdoshmërish ndonjë gjë, por unë mendoj se ato janë të rëndësishme,” tha ai.
Komentet e Macron erdhën pasi qeveria franceze tha të martën se ishte “shumë e mundshme” që dëshmitë do të zhdukeshin nga vendi i sulmit të dyshuar kimik përpara se ekspertët e armëve ndërkombëtare të mbërrinin në zonë.
“Është shumë e mundshme që dëshmitë dhe elementët thelbësorë të zhduken nga vendi, i cili është plotësisht i kontrolluar nga ushtritë ruse dhe siriane”, tha ministria e jashtme franceze, duke i bërë jehonë shqetësimeve nga SHBA që janë hedhur poshtë nga Rusia./OraNews
