Ministria e Kulturës, Mirela Kumbaro ka larguar drejtoreshën e Qendrës Kulturore të Fëmijëve njëherësh dhe e Teatrit të Kukullave, aktoren Monika Lubonja. Në faqen online të ministrisë është shpallur vendi vakant dhe konkursi për këtë pozicion. Nga ana tjetër, Kumbaro nuk e jep motivacionin e largimit të Lubonjës, të cilën vete e emëroi disa vite më parë.
Në emisionin Boom në Ora News janë publikuar disa materiale që flasin për abuzime të znj.Lubonja. Konkretisht për shitjen e repertorit të shfaqjes së Teatrit te Kukullave për aktivitete private dhe një tender për kupat e 70 vjetorit të Qendrës Kulturore.
Po në media raportohej se ndaj znj. Lubonja kanë nisur hetimet nga prokuroria. Opinion.al u interesua dhe mësoi zyrtarisht nga zëdhënësja e Prokurorisë së Tiranës se nuk ka asnjë hetim deri mesditën e së premtes (16 Mars) për znj. Monika Lubonja. Zëdhënësja sqaroi më tej se në muajin Janar ishte referuar një material ndaj saj nga Policia e Tiranës, por nuk janë gjetur prova për abuzime, ndaj hetimet janë mbyllur.
/R.Dedaj-Opinion.al
