Një situatë jo e mirë është shfaqur në Partinë Socialiste të Kukësit, pas vendimit për shkarkimin e Mimi Kodhelit si e deleguar në këtë rreth dhe zëvendësimin me Safet Gjicin.
Mësohet se dega e PS-së Kukës është futur në një përplasje të fortë, për shkak të një mbledhjeje kryesie e socialistëve zhvilluar në 17 janar të këtij viti, në të cilën është vendosur që të largohet Mimi Kodheli si e deleguar për qarkun e Kukësit dhe në vend të saj të komandohet Safet Gjici.
Siç duket, komandimi i tij si delegat për qarkun ka krijuar pakënaqësi të mëdha tek socialistët, ku disa prej tyre kanë zhvilluar një protestë ndaj tij, si dhe kanë nisur një grevë urie.
Për shkak të kësaj situate të krijuar, Partia Socialiste organizoi të martën pasdite një mbledhje kryesie, e cila vendosi që të ketë përsëri zgjedhje për delegatët në Kukës.
Deputeti i PS-së, Ilir Beqaj, ka folur pas mbledhjes së kryesisë duke treguar vendimin që është marrë për të bërë zgjedhje në Kukës. Beqaj tha se kryesia e partisë mori vendimin për të rivlerësuar gjithë procesin zgjedhor pas problemeve organizative, ku nga marsi në maj do të bëhen zgjedhje.
