Këshilli i Legjislacionit dhe Komisioni i Ligjeve janë mbledhur paraditen e sotme për të diskutuar mbi amendamentet e 35 deputetëve të opozitës. Ata kërkojnë që kryeprokurorja e përkohshme Arta Marku të shkarkohet dhe të nisë procedura e zgjedhjes së një prokurori të përkohshëm të përgjithshëm sipas këtyre amendamenteve.
Kërkesat e opozitës janë si më poshtë:
Këshilli aktual i Prokurorisë do të kryente funksionet e Prokurorit të Përkohshëm me vendime kolegjiale, ndërsa aplikimet për Kryeprokuror të Përkohshëm mblidhen nga Gjykata Kushtetuese dhe jo Kuvendi.
Në finale duhet të jetë një kryeprokuror me 3/5 dhe që të ketë kaluar me sukses vettingun. Që vetting të kryhet opozita propozon që lista e 5 më të mirëve që do të rendiste Gjykata Kushtetuese të verifikohet me prioritet nga Komisioni i Posaçëm i Kualifikimit brenda 30 ditëve.
Më pas nëse nga kjo listë nuk cakton dot një kryeprokuror të përkohshëm me 84 vota, do të konsiderohet i zgjedhur ai që Gjykata Kushtetuese ka renditur të parin.
