George Soros del kundër mediave sociale: Janë pengesë e inovacionit

Investitori miliarder George Soros kritikoi monopolet teknologjike duke i cilësuar ato si kërcënim ndaj demokracisë. Gjatë darkës së përvitshme në forumin ekonomik të Davosit, Soros paralajmëroi se platformat e mediave sociale janë një pengesë ndaj inovacionit.
Sipas tij, shqetësimi kryesor është fuqia e tyre për ti dhënë formë vëmendjes së njerëzve. Megjithatë, Soros gjithashtu parashikoi se ditët e tyre janë të numëruara, pasi rregulloret e reja dhe politikat e taksave po arrijnë ritmin e tyre. Miliarderi Soros përmendi disa herë gjatë fjalimit të tij kompanitë Google dhe Facebook dhe tha se duhet shumë mund për të mbrojtur lirinë e mendjes.
“Ka mundësi që pasi kjo liritë të humbet, njerëzit që do të rriten në epokën dixhitale do të kenë vështirësi ta rifitojnë”, deklaroi Soros. Ai shtoi se monopolet e internetit nuk kanë as dëshirën dhe as vullnetin për të mbrojtur shoqërinë nga pasojat e veprimeve të tyre.
Duke përgëzuar BE-në për luftën që i ka shpallur kompanive të mediave sociale, sidomos komisioneren e konkurrencës Margrethe Vestager, Soros tha se BE, duke mos pasur kolosë të internetit, është autoriteti më i mirë për të mbrojtur shoqërinë nga to. Sipas tij, rregullatorët amerikanë janë tepër të dobët për ta bërë këtë.
Soros pati edhe një kritikë për administratën Trump, duke e cilësuar atë një rrezik për botën, ndërsa tha se beson që presidenti trump nuk do të jetë më në post në 2020, apo edhe më shpejt.
Top Channel