Prej më shumë se dy ditësh në media po qarkullon lajmi se Ben Blushi do të jetë Drejtori i Përgjithshëm i Top Channel edhe pse nuk dihet saktësisht nëse ka një marrëveshje zyrtare nga të dyja palët. Lajmi padyshim që ishte i papritur, duke pasur parasysh faktin që Blushi është shkëputur nga bota e medias prej gati 20 vitesh. Ky rikthim i Blushit në pasionin e tij të vjetër, nga aty ku ai hodhi themelet e suksesit të tij, ishte një lajm nga ata që të surprizojnë. Duke qenë se që prej vitit 1998 Blushi ka qenë një prej emrave më të lakuar të politikës, shumë mund ta kenë harruar periudhën e tij në botën e gazetarisë.
Ben Blushi ishte një prej studentëve të dhjetorit të vitit 1990, ku së bashku me shumë emra të tjerë të njohur në botën politike dhe atë të medias, hodhën themelet e para të pluralizmit në vend.
Blushi e nisi rrugëtimin e tij në media, gjatë kohës që ishte student në degën e “Gjuhë – Letërsisë” në fakultetin Filologjik të Tiranës, ku nisi të shkruante vullnetarisht për median e parë të pavarur në vend “Rilindja Demokratike”. Më pas ai do e vazhdonte karrierën e tij mediatike si kryeredaktor i gazetës “Koha Jonë”, post të cilin e mbajti deri në mars të vitit 1997. Në karrierën e tij mediatike Blushi ka punuar pwr radion “Deutsche Welle “ dhe “Indipendent”.
Një tjetër pasion i Blushit ishte edhe ai i të shkruarit libra, ku shumë prej krijimeve të tij letrare kanë qenë suksese të padiskutueshme. Dashurinë për librat Blushi nuk e ndau as kur ishte pjesë e Partisë Socialiste, të cilës iu bashkua në shtator të vitit 1998, kohë kur i dha fund karrierës së tij si gazetar.
Në vitin 2008 Blushi publikoi librin e tij të parë “Të jetosh në ishull” , ku theu edhe rekorde për tregun shqiptar, me 30.000 kopje të shitura. Por ai asnjëherë nuk ka shkruar kur ishte i angazhuar në poste të larta politike. Sukseset e tij letrare përkojnë me kohëra kur karriera e tij politike ka qenë e trazuar ose pasive. Librin e tij të fundit, Blushi e publikoi në vitin 2016, me titullin “KM: Kryeministri”,dhe në panairin e atij viti pati shitje rekord. Në jetën e tij ai ka shkruar 5 libra si; “Të Jetosh Në Ishull, 2008; “Otello, Arapi i Vlorës” 2009; “Shqipëria, 2011”; “Kandidati”, 2015, dhe “KM: Kryeministri” 2016.
Për jetën politike të Blushit ka shumë për të folur. Në vitin 1999, kur kjo parti drejtohej nga Fatos Nano, Blushi arriti të ishte një prej njerëzve më të besuar të kreut socialist. Ai u emërua fillimisht si zv.Ministër i Punëve të jashtme, post të cilin e mbajti për disa muaj. Në fund të vitit 2000 ai do të emërohej Prefekt i Korçës, e ndërsa deri në fund të mandatit të qeverisë Nano ai mbajti poste ministrore si atë të Arsimit dhe Qeverisjes Vendore dhe Decentralizimit.
Së fundmi Blushi ishte kryetari i Partisë Libra, të cilën e themeloi në Nëntor të 2016, pasi u largua nga radhët e partisë socialiste.
Sot Blushi është një ish-politikan, i cili pas gati 20 vitesh shkëputje po merr edhe njëherë mundimin ti rikthehet botës mediatike. Mbetet për tu parë nëse sfida e re e Blushit do të jetë edhe e fundit./Opinion.al (Ema Shazivari)
