Ekzekutimi mafioz i Emiljano Boçit në Tiranë, sipas policisë dyshohet se ka ndodhur për shkak të prishjeve të pazareve të drogës. Gjithashtu, po hetohet edhe pista e hakmarrjes, ku më herët 32-vjeçari ishte akuzuar për plagosje të rëndë me dashje.
Viktima dhe miku i tij që mbeti i plagosur sapo kishin mbaruar drekën tek ky lokal peshku që ndodhet pas policisë Bashkiake në kryeqytet.
Emiljano Boçi u ekzekutua me dy plumba në kokë nga një atentat i tipit mafioz, në momentin që po ndiste automjetin e tij dhe dyshohet se e gjithë ngjarja u fiksua nga kjo kamerë sigurie.
Ndërsa shoku i tij Melvin Disha arriti të fshihej poshtë sediljes së pasagjerit duke marrë vetëm një plumb në shpatull. Policia gjeti në vendngjarje pesë gëzhoja pistolete e llojit Zastave, ndërsa në ulëset e pasme të makinës qëndronte e dashura e 32-vjeçarit Boçi. Mësohet se ka qenë ajo e cila ka njoftuar forcat e policisë, duke shpjeguar se autori ka qëlluar nga pas automjetit tip “Range Rover” në drejtim të vendit të shoferit, çka tregon se objektivi ka qenë pikërisht viktima Emiljano Boçi.
Menjëherë pas krimit autorët u larguan sipas dëshmisë së vajzës nëpërmjet pallateve të lagjes, “Sheqet Musaraj”.
Pista kryesore që po heton policia e kryeqytet është ajo e prishjes së pazareve të drogës. Mësohet se Boçi lëvizte vazhdimisht në drejtim të Gjermanisë dhe Holandës gjatë dy viteve të fundit, ku dyshohet se merrej me trafik droge. Një tjetër version që po hetojnë uniformat blu është hakmarrja. Emiljano Boçi ka qenë një person i njohur për policinë e kryeqytetit. Në 2010 në Selitë, Boçi dhe shoku i tij Roland Hoxha u përplasën me armë zjarri me Astrit Malajn dhe Artur Treskën. Nga të shtënat, Treska dhe Boçi mbetën të plagosur rëndë, ndërsa ky i fundit u dënua për tentativë vrasje dhe bëri vetëm dy vite burg.
Policia ka shoqëruar rreth 25 persona të dyshuar për ngjarjen, por pas marrjes në pyetje ata janë lënë të lirë. Po kështu pritet të merret në pyetje edhe shoku Melvin Disha, i cili ndodhet nën kujdesin e mjekëve në spitalin e Traumës. / ABC News
