Këto janë momentet e panikut kur banorët dhe turistët e ishujve Hauai në Shtetet e Bashkuara u shpërndahet një mesazh alarmi, që i paralajmëronte për rrezikun e lartë se ishujt mund të goditeshin nga një raketë balistike.
Alarmi u përhap me SMS nga Agjencia e Menaxhimit të Emergjencave, që pas 38 minutash e përgënjeshtroi. Por aq minuta mjaftuan që banorët të merrnin masa, duke hyrë në vendstrehimet më të afërta.
Gabimin e kishte bërë një punonjës i qendrës së emergjencës, i cili kishte shtypur padashje butonin e alarmit, që dërgon automatikisht mesazhin paralajmërues për sulm me raketa. Këtë e konfirmuan drejtuesit e administratës lokale, të cilët kërkuan publikisht ndjesë për gabimin.
David Ige, Guvernator i Hauait: Ishte një procedurë e zakonshme gjatë ndërrimit të turneve, kur testohet funksionimi i gjithë sistemit. Dhe një punonjës shtypi butonin e gabuar.
Autoritetet thanë se punonjësi do të ndëshkohet, ndërsa pritet edhe nisja e një hetimi. Përmes Tëitter-it, banorët shprehën momentet e vështira që kishin përjetuar pas dhënies së alarmit. Mes tyre edhe aktori Jim Carrey, i cili ndodhet me pushime në Hauai. Fajin për panikun e përhapur ia hedh presidentit Donald Trump, i cili sipas tij po e bën botën të vuajë duke përhapur armiqësi.
Muajt e fundit, banorët e Hauait po jetojnë me frikën e një sulmi të mundshëm nga Koreja e Veriut, si një prej territoreve më të afërta të Shteteve të Bashkuara me vendin komunist. Të gjendura rreth 7 mijë km larg brigjeve koreanoveriore, ishujt Hauai janë ndër objektivat e para të një sulmi të mundshëm nuklear nga Peniani.
Tv Klan
