Partia Socialiste ndryshon rregullat e lojës në fund të procesit për zgjedhjen e prokurorit të përgjithshëm të përkohshëm. Kujtojmë se kreu i Ligjeve Ulsi Manja kishte deklaruar në fillim të javës se në fund të seancave dëgjimore, në raport do të renditeshin të gjithë kandidatët sipas cilësive dhe Kuvendi do të zgjidhte mes kandidaturave që plotësojnë kriteret”.
Por dje diçka thelbësore ka ndryshuar në procedurën që po ndjek Komisioni i Ligjeve. Të premten 4 kandidatë u skualifikuan dhe në garë mbeten 3 prokurorë: Arta Marku, Ferdinand Elezi dhe Ermira Tafani. Ndryshe nga çfarë deklaroi Manja, kandidatët nuk kalojnë në Kuvend nëse nuk marrin 28 firma deputetësh.
N/kryetarja e Kuvendit, Vasilika Hysi duke folur mbrëmë në në emisionin “Repolitiks” në Report TV konfirmon këtë fakt të ri në procedurë, fakt i cili nuk përmendet në asnjë rresht të vendimit të Komisionit të Ligjeve. Në këto kushte, procesi i garës së hapur dhe publike, kanalizohet në vullnetin politik të një partie apo një tjetër për të ngushtuar garën. Referuar faktit se një deputet nuk mund të firmosë për dy kandidatë, si dhe faktit se PS ka 74 vota, ajo mund të çojë në votim vetëm dy kandidaturave. Ndërkohë që ngelet e hapur mundësia ligjore që edhe opozita të firmosë për një emër të sajin.
