Prokurori i Krimeve të Rënda Besnik Muçi u skualifikua nga gara për Kryeprokuror nga Komisioni i Ligjeve me argumentin se nuk plotëson kushtin e vjetërsisë në punë. Ai e kundërshton këtë duke thënë se ka 15 vite në sistemin e drejtësisë. Por sakaq sfidon publikisht Vasilika Hysin, ambasadorin amerikan Donald Lu dhe zyrën e BE-së në Tiranë.
Duke i permendur me emra sfiduesit, Muçi padashje na zbuloi se këta janë njerëzit që po zgjedhin Prokurorin e Përgjithshëm të Shqipërisë.
Në një deklaratë për mediat ai tha: “Unë sot plotësoj 14 vjet, 11 muaj e 15 ditë si prokuror dhe 1 vit e tre muaj si jurist, OPGJ drejtor i drejtorisë kundër krimit ekonoimik financiar në Ministrinë e Brendshme. Në vlerësimin tim unë i plotësoj kushtet e një juristi të spikatur me përvojë 15 vjet punë si jurist, prokuror dhe OPGJ drejtor i drejtorisë kundër krimit ekonomik financiar”.
Muçi më tej përmendi me emra, Vasilika Hysin, anëtare e komisionit të ligjeve dhe n/kryetare e parlamentit si dhe deputetin Adnor Shameti. Po kështu lëshoi një mesazh për ambasadorin amerikan Donal Lu.
“Ku e kanë gjetur kushtin e 15 viteve prokuror? A lexon gjëkundi? Këto janë aktet që rregullojnë këtë procedurë. Me shumë përultësi i lutem dhe ambasadorit amerikan dhe përfaqësuesve të BE-së në Shqipëri t’ju kërkojnë këshilltarëve të tyre juridikë, a i gjejnë ata vjetërsi pune prokuror për të aplikuar për prokuror të përgjithshëm? Nese po, unë kërkoj ndjesë dhe tërhiqem”, u shpreh ai.
