Deputeti i Partisë Demokratike, Enkelejd Alibeaj, të shtunën, duke iu referuar raportit të Europol se Shqipëria është burimi kryesor i kanabisit në Evropë, deklaroi se ky raport tregon se nuk është opozita që po i nxin faqen vendit dhe se kanabisi është burimi kryesor i tregut të drogave prej 24 miliardë eurosh në BE.
“Droga dhe krimi që Shqipëria eksporton në Bashkimin Evropian janë arsyeja kryesore që Shqipërisë i mohohet prej tre vjetësh hapja e negociatave”, theksoi Alibeaj.
Ai tha se vendet e BE-së kërkojnë luftë kundër drogës dhe krimit të organizuar dhe të nxirren para drejtësisë të paprekshmit.
Për Alibeajn rruga e Shqipërisë për në Bashkimin Europian kalon vetëm nga nxjerrja para drejtësisë e krimineleve që sipas tij i mbron kryeministri.
Alibeaj: Droga dhe krimi që Shqipëria eksporton në Bashkimin Europian janë arsyeja kryesore që Shqipërisë i mohohet prej tre vjetësh hapja e negociatave. Vendet e Bashkimit Europian po kërkojnë përditë luftë kundër drogës dhe krimit të organizuar dhe nxerrjen para drejtësisë të të paprekshmëve. Ato po e thonë fare qartë se nuk do t’i hapin negociatat, nëse në Shqipëri nuk shkatërron organizatat kriminale të trafikut dhe nese nuk nxirren para drejtësisë politikanët që e lejuan dhe bashkëpunuan me krimin. Rruga e Shqipërisë për në Bashkimin Europian kalon vetëm nga nxjerrja para drejtësisë e Saimir Tahirit, Vagjush Dakos, Qazim Sejdinit, Agron Xhafës, Habilajve dhe Balilajve me shokë.
