Deputetja demokrate, Rudina Hajdari (vajza e Azem Hajdarit) duke folur në foltoren e Parlamentit tha se “Saimir Tahiri nuk duhej të ishte deputet. Ai duhet të përballej me drejtësinë sepse fati i tij nuk mund të faret nga portalet apo ndonjë deputet.
“Kjo nuk mund të jetë një seancë normale, pas ngjarjeve të fundit dhe deklaratave të ndërkombëtarëve. Pyetja që duhet ditur sot: Në ç’derexhe janë katandisur sot politikanët tanë? Saimir Tahiri duhet ti hiqej imuniteti plotësisht. Fati i tij nuk duhet të qëndrojë në dorë të portaleve apo edhe në dorë të një deputeti. Nëse pandeh se mund të fitojë le të shkojë në gjykatë dhe ajo të japë vendimin. Jemi këtu për të ofruar një zgjidhje”, tha deputetja.
Por nga ana tjetër, Hajdari thotë se Tahiri nuk është thjesht një politikan i akuzuar për lidhje me krimin, ai është viktimë e këtij sistemi të degraduar politik.
“Nuk është krenari të shoh reputacionin e vendit tim të denigruar. Kjo qeveri ka dështuar t’u japë shqiptarëve atë që meriton. Nuk po sulmoj Tahirin se ai është viktimë e këtij sistemi që ka degraduar. Nuk mund të flasim për trafikun e drogës vetëm në mënyrë lekësh, por duhet të kuptojmë se pas këtyre skandaleve fshihen njerëz”, u shpreh ajo.
