Ministrja e Drejtësisë, Etilda Gjonaj, mbrëmjen e sotme, në emisionin “Dritare me Rudinën” ka folur për shkarkimet e drejtorëve të Burgjeve.
Gjonaj ka treguar se drejtuesit e rinj, nuk do të jenë të emëruar politikisht. Sipas saj, me emërimet nga konkurset, do të zgjidhen njerëz profesionistë, që kanë punuar kryesisht në sektorin e burgjeve.
“Reforma në burgje ka të bëjë me aftësitë e personave që e drejtojnë atë. Nuk ka lidhje me ministra që vijnë në krye të Drejtësisë. Ne duam të fusim në sistem mënyrën e emërimit, që deri dje ishin bërë për qoka, apo për të kënaqur interesat e ministrave apo deputetëve. Ministri i Drejtësisë me propozimin e Drejtorit të të Përgjithshëm zgjedh drejtorët e burgjeve. Ne nuk duam që në krye të këtij sistemi, të kemi drejtorë që janë të paaftë, që mund të jenë me rekorde kriminale. Kemi vendosur që në mënyrë rrënjësore të vendosen drejtorë të rinj në 23 burgje. Do të emërohen punonjës brenda sistemit, që kanë një karrierë në këtë sektorë. Nuk po bëhen këto ndryshime për shoë. Ne kishim bërë inspektime në burgje dhe gjetëm shkelje të shumta, prandaj ndërmorëm shkeljet”, tha Gjonaj, duke treguar se çfarë shkeljesh kanë kapur.
Ajo tregoi se një nga drejtorët e Burgjeve lejonte futjen e mjeteve të ndaluara, si drogë dje celularë. Gjonaj tha se Prokuroria e Elbasanit na ka dërguar shkresë, që ishin dërguar 90 procedime penale që i përkisnin burgut të Peqinit.
“Nuk di t’u them nëse ka qenë emërim politik, por drejtori i burgut të Peqinit, ishte i emëruar pa konkurrim. Ndërsa, ne duam të garantojmë profesionalizimin. Unë nuk mund të firmos një drejtor që ka procedime penale”, tha Gjonaj./Dritare.net
