Gjykata ka vendosur “arrest me burg” për autorin e dyshuar të vrasjes së dyfishtë që tronditi Gjirokastrën tri ditë më parë.
Apostol Kosta, 70-vjeç, është njohur me masën e sigurisë në ambientët e spitalit të burgut në Tiranë, ku ndodhet i shtruar në gjendje të rëndë.
Kosta tentoi të vetëvritej, pasi ekzekutoi çiftin Aleko dhe Afërdita Kosta.
Avokati i 70-vjeçarit, Shpëtim Meci kërkoi një masë lehtësuese për Kostën, por gjykata ka pranuar kërkesën e prokurorisë për ta lënë në burg pa afat.
(viktimat)
Ngjarja
Rreth orës 07:10, në banesën e Aleko Kostës ka hyrë pa paralajmërim 70- vjeçari Apostol Kosta.
Rezulton se ai është futur nga porta kryesore dhe ka hedhur brenda shtëpisë një granatë defensive. Pasi hodhi granatën, u largua me shpejtësi për të shpëtuar veten, por kanë kaluar disa minuta dhe granata nuk ka shpërthyer për shkak se detonatori ishte i lagur.
Gjendur në këto kushte, Apostol Kosta ka marrë një armë automatike që e mbante në shtëpi dhe ka shkuar sërish në banesën e djalit të xhaxhait të tij.
Aleko Kosta ka marrë 12 plumba, pjesën më të madhe në kokë, ndërsa gruaja e tij Afërdita ka marrë 10 plumba në trup, kryesisht në pjesën e kraharorit dhe poshtë te këmbët. Ai ka ruajtur fishekët e fundit dhe është nisur me vrap drejt banesës së tij. Fatmirësisht plumbave u ka shpëtuar djali 20-vjeçar i Afërditës (nga martesa e saj e parë), i cili në momentin e krimit ka qenë duke fjetur në dhomë tjetër.
