Gazetari Armand Shkullaku ka reaguar ashpër për fyerjet që kryeministri Edi Rama ka bërë ditën e sotme ndaj gazetarëve në një dalje për mediat. Shkullaku ka deklaruar ne “Opinion” se kjo nuk ndodh në asnjë vend të Europës, që një kryeministër të sulmojë një pushtet i cili nuk varet prej tij.
“Rama nuk ka asnjë kompetencë për një pushtet që nuk buron dhe varet prej tij. I vetmi metër që gjykon vlerësimin e mediave është publiku”, tha Shkullaku.
Më tej Shkullaku ka deklaruar se Rama që kur ishte kryetar Bashkie e deri më sot i kontakton gazetaret për të hequr lajmet e tij.
“Rama e quan gazetarinë një tel bakri, por nëse ka një njeri që ka tentuar të veshi me tel bakri mediat në Shqipëri ky është Edi Rama. Nuk besoj se ka kryeredaktorë, redaktorë, gazetarë, reporterë dhe kameramanë, që nuk e mban mend Edi Ramën kryetar Bashkie, Edi Ramën kur konkurronte me Fatos Nanon që merrte nga mëngjesi deri në darkë në telefon, aman ma hiq atë kronikë, aman ma hiq këtë kronikë”, u shpreh Shkullaku.
Shkullaku e ka quajtur Ramën shkatërruesin e mediave. /Opinion.al
