Deputeti Gent Strazimiri, anëtar i Këshillit të Rregullores, Mandateve dhe Imuniteteve, përgënjeshtroi deklaratat e deputeteve socialistë Ulsi Manja dhe Vasilika Hysi se ai dispononte më parë një dosje sekrete të Prokurorisë së Krimeve të Rënda për arrestimin e ish- ministrit te Brendshëm, Sajmir Tahiri.
Strazimiri tha se ato që socialistët i cilësuan si dokumenta sekrete nën disponim ekskluziv prej tij, ishte dosja e Prokurorisë së Katanias e bërë publike nga Kryetari i PD, Lulzim Basha.
Dosja u publikua që të martën në faqen e PD dhe në llogarinë në Facebook të Bashës. Nga statusi i Strazimirit mësohet se vetëm dy ditët e para kjo dosje ka patur 1.234.571 lexues. Ai thotë se “këta lexues nuk janë demokratë, por njerëz të lirë që duan të vërtetën
dhe përbuzin spërdredhjet e bandës që kërkon t’i bëjë për budallenj, duke përdorur deputetë shumëpërdorimësh.”
Statusi i plotë
Dështon operacioni “Griselda 2”!
Më poshtë keni “dokumentat sekrete” që disponoja “ekskluzivisht” në mbledhjen e Komisionit te Rregullores dhe Mandateve!
Prokuroria nuk I ka akoma, unë po! Unë dhe të paktën 1.234.571 individë të tjerë!
Administratorët e faqes më thonë se 48 orët e para ky material ka patur 1.234.571 lexues!
Janë 1.234.571 NJERËZ TË LIRË, që nuk janë demokratë por që duan TË VËRTETËN dhe përbuzin spërdredhjet e bandës që kërkon t’i bëjë për budallenj, duke përdorur deputetë shumëpërdorimësh…
