Kultivimi i kanabisit në të gjithë vendin, nuk është vetëm përgjegjësi e kryeministrit Edi Rama, por edhe Ilir Metës.
Kryetarja e Lëvizjes Socialiste për Integrim, Monika Kryemadhi, në një intervistë për “Top Story”, ka folur sërish për çështjen e kanabizimit në vend.
Kryemadhi theksoi se fajtori në këtë mes nuk është vetëm Edi Rama, i cili lejoi mbjelljen e drogës në çdo vend, por edhe Ilir Meta, që nuk reagoi.
Ajo ndan në mënyrë të barabartë përgjegjësinë mes Edi Ramës dhe Ilir Metës, sa i takon trafikut të lëndëve narkotike.
“Ilir Meta ka përgjegjësinë e tij dhe në momentin që sheh që gjërat nuk janë ashtu siç duhet…ai që në momentin që ka vënë re çështjen e drogës duhej të kishte reaguar. Ai është po aq fajtor sa Edi Rama, sepse ka mbyllur sytë, ka mbyllur edhe gojën”, u shpreh ajo.
Heshtjen e Metës, Monika Kryemadhi e lidhi me nevojën që politika të kalonte reformën në drejtësi.
“Ai tërhiqte gjithmonë vëmendjen tek reforma në drejtësi”, u shpreh kryetarja e LSI-së.
“Edi Rama gaboi. Tha sot se Saimir Tahiri është një dru i shtrembër në stivën e druve. Nuk është e vërtetë. Saimir Tahiri ka qenë bashkëpunëtori më i ngushtë i tij. Edi Rama nuk duhet të flakte Saimir Tahirin sepse e ka mbrojtur si ministrin më të suksesshëm”, vijoi Kryemadhi.
Sipas kryetares së LSI-së të gjitha këto minojnë procesin e vettingut.
“Çfarë besimi kam unë tek Edi Rama për vettingun sot?”,-thekson Kryemadhi.
