Policia Rrugore e Tiranës ka ndërmarrë një aksion ndaj drejtuesve të furgonave që transportojnë fëmijët në shkolla duke vendosur një sërë gjobash dhe madje deri në heqje të patentave.
Përmes një njoftimi për mediat bëhet e ditur se “po vijon kontrolli i automjeteve të shërbimit publik, që transportojnë fëmijë në shkolla e kopshte. Kontrolli ka konsistuar në drejtim të dokumentacionit, kryesisht të kontrollit teknik të këtyre automjeteve si dhe në drejtim të zbatimit me përpikmëri të rregullave të transportit të fëmijëve”.
“Gjatë kontrolleve të ushtruara këtë jave, Policia Rrugore e Tiranës ka konstatuar një sërë shkeljesh në drejtim të kontrollit teknik të automjeteve, si dhe në drejtim të transportimit të fëmijëve, duke mos vendosur rripin e sigurimit fëmijëve, apo jashtë vendeve të lejuara, duke transportuar më shumë fëmijë sesa i lejohet.
Gjatë kësaj jave janë dërguar në komision për heqje patente 21 drejtues mjetesh. Policia kërkon mirëkuptimin e prindërve, që ata të mos pranojnë që fëmijët e tyre të transportohen jashtë kushteve teknike duke vënë në rrezik jetën e tyre.
Po kështu policia publikon edhe video ku efektivi shfaqet duke pyetur nxënësit nëse udhëtojnë në kushtet optimale.
Sakaq, shoferët e furgonave kanë protestuar disa ditë më parë pikërisht për reprezaljen e policisë rrugore dhe asaj bashkiake. Në gjithë Tiranën janë 700 furgonë që transportojnë fëmijë në shkolla dhe kopshte. Shoferët ankohen se policia nuk po i lë të punojnë pasi këtë shërbim Bashkia kërkon ta bëjë monopol duke licensuar një kompani private për transportin e fëmijëve në shkollë.
Deri sa ky problem të zgjidhet nga Bashkia e Tiranës dhe Policia Rrugore janë prindërit ata që vujanë pasojat. Nëse hiqen patentat dhe policia nuk lejon furgonët të punojnë përpara qindra e mijëra prindërve në Tiranë shtrohen problemi i madh i dërgimit dhe marrjes së fëmijëve në shkolla apo kopshte. /Opinion.al
