Kryetari i Kuvendit, Gramoz Ruçi, në fund të seancës të ditës së sotme, nuk ka preferuar të marrë masa më të ashpëra ndaj kreut të PD-së, Lulzim Basha për bllokimin e foltores me arsyen se e “ka për herë të parë”.
Sipas tij, duke qenë se deputeti i ndëshkuar është për herë të parë, gjithashtu edhe për herë të parë deputet, nuk u morën masa edhe më të ashpëra, siç e lejon rregullorja.
“Sa për sqarim, duke qenë se deputeti i ndëshkuar është për herë të parë, po kështu edhe për herë të parë deputet, njoftoj deputetët dhe opinion publik që nuk po ushtroj kompetencën që më jep rregullorja si Kryetar i Kuvendit për të thirrur Byronë e Parlamentit për të marrë masa akoma më të rënda për situatën e sotme. Seancën e deklaroj të mbyllur, mirupafshim”.
Paraditën e së enjtes, gjatë një seance të tensionuar, Kryetari i Kuvendit, Gramoz Ruçi u detyrua të ndërpresë punimet pesë herë për shkak të bllokimit të foltores së Kuvendit nga deputetët e PD-së.
Për këtë arsye, Ruçi përjashtoi kryetarin e PD-së Lulzim Basha nga Kuvendi, mirëpo, pavarësisht këtij ndëshkimi, Basha bashkë me deputetët e tij nuk u larguan nga salla e Kuvendit për shumë orë.
Seanca plenare që rinisi në orën 18:00 u mbyll me disa miratime të shpejta të axhendës së ditës dhe miratim me votat e maxhoranës edhe të kalendarit tre javor të punimeve.
Pasi doli nga salla e Kuvendit, kryedemokrati Basha u kërkoi shqiptarëve të marrin parlamentin në duart e tyre, dhe siguroi edhe një herë tjetër se “Ne nuk do të lejojmë kurrë që Gramoz Ruci dhe Edi Rama të kthejnë pas kohën e Shqipërisë.
