Pasi PD-ja kërkoi ti hiqet mandati deputetit të PDIU, Aqif Rakipi, Kryeministri Edi Rama ka thirrur në zyrë Prokurorin e Përgjithshëm, Adriatik Llalla. Takimi është zhvilluar në selinë e qeverisë, tha zyra për mediat e prokurorisë.
Po sipas informacionit zyrtar mësojmë se në fokus të takimit ishte diskutimi mbi kërkesën e subjektit politik, Partia Demokratike, lidhur me verifikimin e thelluar në kuadër të ligjit të njohur si “Për Dekriminalizimin”, për deputetin Aqif Rakipi.
“Prokuroria e Përgjithshme ka nisur verifikimin e thelluar ndaj deputetit Aqif Rakipi disa muaj më parë. Procedura e verifikimit për këtë subjekt është ende në zhvillim, pasi Sektori i Posaçëm për “Dekriminalizimin” në Prokurorinë e Përgjithshme është ende në pritje të përgjigjeve nga ana e disa prej autoriteteve të huaja, të cilave u është kërkuar informacion”, mësohet të jetë shprehur Llalla.
Në lidhje me rastin e deputetit Gjetan Gjetani, organi i akuzës tha se do të nisë verifikimet e thelluara për në bazë të kërkesave që dërgojnë subjekteve të njohur nga ligji, si edhe me iniciativën e saj.
Gjithashtu, Prokurori i Përgjithshëm theksoi se, po vijon bashkëpunimi me autoritetet e tjera që kanë për detyrë verifikimin paraprak të subjekteve të ligjit “Për Dekriminalizimin”, ku veçoi Komisionin Qendror të Zgjedhjeve (KQZ), si institucioni që kryen përpunimin paraprak të personave të zgjedhur në pushtetin qendror dhe lokal.
Kujtojmë se Aqif Rakipi ka fituar një mandat të dytë në Parlamentin e Shqipërisë në siglën e PDIU-së ndërsa Gjetan Gjetani deputet i Lezhës për PS hyn për herë të parë në parlament. /Opinion.al
