Autoritetet italiane kanë vënë nën hetim prindërit e 2-vjeçares shqiptare që humbi jetën pasi u sulmua nga dy qenë të rracës pitbull.
Ngjarja e rëndë ka ndodhur në Breshia të Italisë më 17 shtator, kur 2-vjeçarja ishte në shtëpinë e gjyshit të saj.
Mediat italiane raportojnë se hetuesit kanë vendosur të marrin nën hetim mamanë 22-vjeçare italiane dhe babain 24-vjeçar shqiptar. Ky i fundit punon në Gjermani si emigrant për të siguruar më shumë të ardhura për familjen.
Nën hetim është vënë gjithashtu edhe veterineri i dy qenve. Sipas “Giornale di Brescia”, disa javë më parë dy qentë kishin sulmuar dhe plagosur një qen tjetër. Veterineri u kujdes për qenin e plagosur, por nuk raportoi këtë ngjarje tek autoritetet kompetente, sikurse e kërkon ligji italian.
Personi i parë që u ngrit akuzë për vdekjen e vogëlushes shqiptare, ishte gjyshi i saj i cili kishte në përgjegjësi dy qentë pitbull të cilët i mbante në shtëpi. Në momentin e ngjarjes, gjyshi dhe mbesa po luanin me qentë në oborrin e shtëpisë së tyre, kur u sulmuan nga dy pitbullët.
Edhe gjyshi mbeti i plagosur nga kafshimet teksa po mundohej të shpëtonte mbesën e tij. U desh ndërhyrja e policisë, të cilët qëlluan me armë qentë. /tvklan.al
