Një tentativë vrasje ka ndodhur dje në Gramsh ndërsa lajmi u bë i ditur sot nga policia. Ajo tha se është arrestuar Luan Taragjini, 51 vjeç me banim në fshatin Grabovë të Gramshit pasi dje në orët e para të mëngjesit, në fshatin Taragjin, dyshohet se ka tentuar të vrasë me armë gjahu shtetasin me inicialet L.T., 60 vjeç.
Gjatë kontrollit të banesës të arrestuarit i gjenden dhe i sekuestrohen nga Policia 13 copë fishekë armë gjahu.
I plagosuri dërguar menjëherë në spitalin e Gramshit, ka marrë dëmtime në krahun e djathtë dhe ndodhet nën kujdesin e mjekëve, jashtë rrezikut për jetën.
Nga veprimet e para hetimore ka rezultuar se shtetasi L.T, në orët e para të mëngjesit të datës 21.09.2017 kishte dalë nga shtëpia dhe ishte nisur për të shkuar në Korçë, pasi ka ecur 10 minuta në këmbë, në fshatin Taragjin dyshohet të jetë qëlluar me armë gjahu nga shtetasi i arrestuar nga ana e policisë si autor i dyshuar i kësaj ngjarje.
Policia vijon punën për sqarimin e plotë të ngjarjes dhe dokumentimin e plotë ligjor të saj.
Materialet i kaluan Prokurorisë Pranë Gjykatës së Shkallës së Parë Elbasan për veprime të mëtejshme për veprat penale “Vrasja me dashje, e mbetur në tentativë”, dhe “Prodhimi dhe mbajtja pa leje e armëve të gjuetisë dhe sportive”, parashikuar nga nenet 76, 22 dhe 280 të Kodit Penal.
