Një ditë përpara seancës të ditës së shtunë, dy partitë e mëdha në Kuvend, PD dhe PS, kanë lajmëruar mbledhjet për grupet e tyre parlamentare.
Partia Socialiste do të mblidhet në orën 12:00, ndërsa kreu i Partisë Demokratike Lulzim Basha ka vendosur ta thërrasë këtë mbledhje në orën 18:00 të ditës së sotme.
Legjislatura e 9 e Kuvendit të Shqipërisë e dalë pas zgjedhjeve të 25 qershorit do të nis të shtunën në datën 9 shtator, ora 10:00.
Direkt pas mbledhjes, Kuvendi do të zgjedhë Këshillin e Përkohshëm të Verifikimit të Mandateve i cili përbëhet nga 9 deputetë që do të shqyrtojnë dokumentacionin e çdo deputeti. Deputetët që do të përbëjnë Këshillin e Përkohshëm të Verifikimit të Mandateve propozohen nga grupet parlamentare dhe zgjidhen me 71 vota.
Mësohet se ky këshill do e bëjë këtë raport brenda ditës së shtunë dhe më pas në po këtë ditë në orën 18:00, seanca parlamentar do të mblidhet sërish që deputetët e rinj të bëjnë betimin e tyre.
Në seancën e pasdites do të zgjidhet edhe kreu i ri i Kuvendit, ku deri tani ka vetëm një propozim dhe ai është Gramoz Ruçi. Zgjedhja e kryetarit të Kuvendit bëhet pa debat.
Seanca e parë e parlamentit të ri pritet të drejtohet nga deputeti socialist Besnik Bare. Më herët deputetët e opozitës, duke nisur nga deputeti më i vjetër, Sali Berisha, e më tej Tritan Shehu refuzuan të drejtonin seancën e parë parlamentare.
Kosova e po Ish-kryeministri pritet të jetë i pranishëm në seancë, por nuk ka pranuar ta drejtojë atë. I dyti në listë është sërish demokrat, deputeti Tritan Shehu, por edhe ai në këtë rast, bashkë me demokratin tjetër Halim Kosova kanë refuzuar gjithashtu, duke preferuar të mos e çelin këtë sesion të ri parlamentar.
Në këtë sesion të ri parlamentar, Partia Socialiste ka 74 mandate dhe drejton e vetme qeverinë. /Opinion.al
